---

O Willie's ta'en him ower the raging faem;
He's woo'd a wife and he's brocht her hame.

He's woo'd her for her lang yellow hair,
But his mother wrocht her muckle care.

And muckle dolour gar'd her dree,
For light o' bairn his lady canna be,
For light o' bairn she canna be.

And aye she lies in her bower wi' pain.
And Willie mourns his lady a' in vain,
And Willie mourns her a' in vain.

So Willie's tae his wicked mither gane,
The vilest witch o' womankind.

And says, “My lady has a bonnie cup
Wi' gowd and silver set aboot.

“This goodly gift it shall be yer ain,
Gin ye let her be lighter o' her bairn,
Gin ye let her be light o' bairn.”

“O, light o' bairn she ne'er will be,
Nor in her bower will shine sae bricht for ye,
Nor in her bower will shine for thee.

“But she will die and slowly turn tae clay,
You will wed wi' anither may.”

“O, anither may I'll never wed,
Anither may shall never share my bed;
I'd rather die,” young Willie said.

So Willie's tae his mither yet again,
That vilest witch o' womankind.

And says, “My lady has a milk-white steed,
Like o' it's no' in the lands o' Leed.

“At ilka tett o' that horse's mane
Hangs fifty bonnie siller bells and ten,
Fifty siller bells and ten.

“This goodly gift it shall be yer ain,
Gin ye let her be lighter o' her bairn,
Gin ye let her be light o' bairn."

“O, light o' bairn she ne'er will be,
Nor in her bower will shine sae bricht for ye,
Nor in her bower will shine for thee.

“But she will die and slowly turn tae clay,
And you will wed wi' anither may.”

“O, anither may I'll never wed,
Anither may shall never share my bed;
I'd rather die,” young Willie said.

So Willie's tae the wise old Billy Blind,
And aye he spoke oot in good time.

He says, “Go down intae the market place,
There ye'll buy a loaf of wax.

“And shape it bairn and bairnie-like
And in its heid twa glassen e'en ye'll put,
And in its heid twa e'en ye'll put.

“And you will tae yer wicked mither gae,
Invite her tae yer son's christenin'.

“But ye must stand a wee forbye
And listen weel what yer wicked mither says,
Listen weel what she does say.”

So Willie's tae his wicked mither gane,
Invited her tae his son's christenin'.

And he did stand a wee forbye
And listened weel what his wicked mither said,
Listened weel what she did say.

“O, wha has loosened the nine and witchen knots
That were amang yon lady's locks?

“And wha has ta'en oot a' the kaims o' care
That hung amang yon lady's hair?

“And wha has killed the Master kid
That ran beneath that bonnie lady's bed,
That ran beneath that lady's bed?

“And wha has ta'en doon the bush o' woodbine
That hung atween that lady's bower and mine,
That hung atween her bower and mine?

“And wha has loos'd her left-foot shee,
So light o' bairn this lady then might be,
So light o' bairn this lady be?”

Then Willie's ta'en oot the nine and witchen knots
That were amang his lady's locks.

And Willie's ta'en oot a' the kaims o' care
That hung amang his lady's hair.

And Willie's killed the Master kid
That ran beneath his bonnie lady's bed,
That ran beneath his lady's bed.

And Willie's ta'en doon the bush o' woodbine
That hung atween his lady's bower sae fine,
Hung atween her bower sae fine.

Then Willie's loosened his lady's leften shee,
That light o' bairn she then might be.

And when and a' these things were done,
His lady's brocht forth untae him a son,
His lady's brocht forth a bonnie son.

---

Teksty umieszczone na naszej stronie są własnością wytwórni, wykonawców, osób mających do nich prawa.