---

Ó chuaigh mé seal tamaill-se ar cuairt
Gur bhreathnaigh mé uaim an spéir
Ó thart fá na hoileáin de ruaig
Mar eilit is cú ina diaidh

'Sé deireadh gach duine fán chuan
Nuair a tháinig mé anuas fán ché
“Ó aithním go maigh ar do ghruaim
Gur fear thú a bhfuil tóir ina dhiaidh.”

Ó casadh domh cailín deas óg
Ach má casadh is sí a labhair go géar
“Más fear thú a bhain dó mhnaoi óig
Ní mholaim go mór do cheird.

“Ó chonaic mé fear ar tír mór
'S é ag imeacht gan a bhróig inné
Is dóigh liom gur tusa an fear óg
A bhfuiltear sa tóir ina dhiaidh”

Ó d'fhreagair mé an ainnir dheas óg
Mar ghlac sí go mór mo scéal
“'S atád tusa a' do mhagadh níos mó
Ná ní duine den tsórt sin mé.

“Ach druid thusa anall a mo chomhair
'Gus stad de ghlór gan chéill
Nó rachaidh mé os coinne mo shróin'
Amach ar tír mór de léim.”

Nuair a thit muid chun tuirse 's chun bróin
'Sé a d'fhiafraíos den óigbhean chiúin
Cá h-áit a bhfaighfí gloine le hól
A thógfas an brón seo dínn?

“Ó tá teach beag ar leataobh an róid
Agus coinníonn sé i gcónaí braon
Gabh thusa agus rapáil ar bord
Is ní dhíolfaidh do phócaí aon phingin.”

Nuair a chuaigh muid isteach i dtigh an óil
Ó b'fhaiteach go leor muid suí
Ar fhaitíos 's go dtiocfadh an tóir
Is go mbainfí an óigbhean díom.

Nuair a fuair muid gach ní mar ba chóir
Dúirt mise gur chóir dúinn siúl
Ach sé dúirt sí, “Bí thusa a' ghabháil cheoil
Is ní dhíolfaidh do phócaí aon phingin.”

Ó ní raibh mé i bhfad ag gabháil cheoil
Gur chruinnigh an t-aos óg chun tí
Bhi gach duine is a juga ina dhorn
Le comóradh a thabhairt don dís.

Bhí biotáilte fairsing go leor
Is gan mórán á ól sa tír
Ach dá n-ólfainnse galún Uí Dhomhnaill
B'fhurast mo scór a dhíol.

---

Teksty umieszczone na naszej stronie są własnością wytwórni, wykonawców, osób mających do nich prawa.