Je ne cuit pas qu'onques à creature Amours partist ses biens si largement Comme à moy seule, et de sa grace pure; Nom pas qu'aie deservi nullement Les douceurs qu'elle me fait, Car gari m'a de tous maulz et retrait, Quant elle m'a donné, sans retollir, Mon cuer, m'amour et quanque je desir.
Et pour ce sui pleinne d'envoyseüre Gaye de cuer et vif tres liement Et ren toudis à Amours la droiture Que je li doy: c'est amer loyaument En foy, de cuer et de fait; Et ceste amour pensée ne me lait Qui joieuse ne soit pour conjoïr Mon cuer, m'amour et quanque je desir.
Si qu'il n'est riens où je mette ma cure Fors en amer et loer humblement Amours, qui me norrist de tel pasture Com de merci donnée doucement D'amoureus cuer et parfait; Mais la merci qui einsi me refait, C'est de veoir seulement et oïr Mon cuer, m'amour et quanque je desirTeksty umieszczone na naszej stronie są własnością wytwórni, wykonawców, osób mających do nich prawa.
