---

Mia cara madre
Sta pe trasí Natale
E a stá luntano cchiù mme sape amaro
Comme vurría allummá dduje o tre biangale
Comme vurría sentí 'nu zampugnaro

A 'e ninne mieje facitele 'o presepio
E a tavula mettite 'o piatto mio
Facite, quann'è 'a sera d' 'a Vigilia
Comme si 'mmiez'a vuje stesse pur'io

E nce ne costa lacreme 'st'America
A nuje Napulitane
Pe nuje ca ce chiagnimmo 'o cielo 'e Napule
Comm'è amaro 'stu ppane

Mia cara madre
Che so', che so' 'e denare?
Pe chi se chiagne 'a Patria, nun so' niente
Mo tengo quacche dollaro, e mme pare
Ca nun so' stato maje tanto pezzente

Mme sonno tutt' 'e nnotte 'a casa mia
E d' 'e ccriature meje ne sento 'a voce
Ma a vuje ve sonno comm'a 'na "Maria"
Cu 'e spade 'mpietto, comm'ô figlio 'ncroce

E nce ne costa lacreme 'st'America
A nuje Napulitane
Pe nuje ca ce chiagnimmo 'o cielo 'e Napule
Comm'è amaro 'stu ppane

---

Teksty umieszczone na naszej stronie są własnością wytwórni, wykonawców, osób mających do nich prawa.