---

Bakit di man lamang nga ba umulan?/
o ni umambon man lang at nang masabi natin sa'ting mga sariling nagtatanong/
na Oo at may luhang pumatak bukod sa mga luhang nanggaling sa mga mata nitong inulila/
sa mga mata nitong nagluluksa sa pagpanaw nitong kaawa-awang matanda/
na Oo at nakikiramay ang langit kasama ng anim na itong piniling dumalo/
ng anim na empleyado ng establisyamentong labintatlong taon niyang pinagsilbihan/

Labintatlong taon ng pag-iis-is ng nanlilimahid at namamanghing palikuran/
ng paglalampaso at pagwawalis na siyang magtatawid sa araw- araw/
Labintatlong taong ginugol,inubos, sinunog sa pagtitiis, namuhay nang walang buhay/

at bakit 'ni hindi man lamang nga ba umulan? sa halip/ ay/
nakakabalisang init ng tirik na araw, abala at walang pakialam/
tanging ingay, walang punebre, walang musika ng pagluluksa/
wala tayong magagawa/
ito lang ang halaga na kinaya ng kanyang pinundar/

paano na si Magda?/
ngayong wala na ang taong kumupkop sa ulilang hindi pinanindigan/
ng kanyang tunay na ama at ina./
wala tayong magagawa/
ang halaga ng gamot at pagkabuhay nitong matanda'y higit pa sa kanyang naipundar/

teka../
hindi kaya../
ako'y nakatingin../
sa aking.../
sariling.../
Libing!?!/

limampu,tatlumpu, o ilangpung taon makalipas/
mamamatay rin ba akong hikahos at wala?/
ng abo sa abo't alabok sa alabok at wala nang iba/
at hanggang sa huli'y nasa ibaba ng inyong mga mata/
katulad ba niya'y uubo rin ako ng dugo?/
lalayuan at pandidirihan hanggang sa pagkamatay/
at hanggang sa huli'y hindi man lang binisita/
ng kanyang mag-inang nawala na parang bula/
ng pagtakas sa buhay probinsya't asawang palamunin/
sa asawang nilamon ng bisyo at katamaran/
ako ang siyang lumikha ng aking ikapipighati/
ako ang siyang may-akda ng aking sariling libing./

---

Teksty umieszczone na naszej stronie są własnością wytwórni, wykonawców, osób mających do nich prawa.